«Գրանիշն» իր հիմնադրման առաջին իսկ օրվանից ստանձնել է մի առաքելություն, որը դուրս է սովորական գրական պարբերականի սահմաններից։ Մեզ համար գրականությունը լոկ տեքստերի հավաքածու կամ ժամանցի ձև չէ, այլ կենդանի, անընդհատ շարժման մեջ գտնվող մտավոր ու գեղագիտական տարածություն, որտեղ ձևավորվում է ժամանակակից հայի ինքնությունը, լեզվամտածողությունը և քննադատական միտքը։
Որպես գլխավոր խմբագիր՝ մեր թիմի գլխավոր առաջնահերթությունն եմ համարում անհաշտությունը միջակության հանդեպ և լույսի տակ բերելը այն ամենը, ինչն ունի գեղարվեստական անվիճելի արժեք։ Մենք հավատացած ենք, որ ժամանակակից հայ գրականությունն ունի բավարար ներուժ՝ համաշխարհային գրական դիսկուրսի մաս կազմելու համար, և «Գրանիշի» խմբագրական քաղաքականությունը միտված է հենց այդ չափանիշների պահպանմանն ու զարգացմանը։
Մեր էջերում տեղ ունեն ինչպես կայացած, վաստակաշատ հեղինակները, այնպես էլ այն նոր, համարձակ ձայները, որոնք չեն վախենում փորձարկումներից, նոր ձևերի ու ասելիքի որոնումից։ Միևնույն ժամանակ, մենք հատուկ հոգածությամբ ենք վերաբերվում թարգմանական գրականությանը և գրականագիտական վերլուծություններին՝ ձգտելով ընթերցողին առաջարկել խորքային, բազմաշերտ ու բարձրաճաշակ ընթերցանություն։
«Գրանիշը» բաց է բոլոր նրանց համար, ում համար հայերենն ու գրական միտքն ապրող, շնչող և ապագա ձևավորող արժեքներ են։ Շնորհակալ ենք մեր ընթերցողներին, հեղինակներին և աջակիցներին՝ այս ճանապարհը միասին անցնելու և որակյալ գրական միջավայր ձևավորելու համար։
Հասմիկ Հակոբյան
«Գրանիշ» գրական հարթակի գլխավոր խմբագիր
