Չպատկերացնենք ինքներս մեզ, լինե՛նք։
***
Ամենադժվարը ինչ-որ մեկի անցյալը կանխատեսելն է։
***
Պետք է վիրավորել հաճոյախոսություններով։
***
Ամեն գորշ նյութ չէ, որ ընդհանուր բան ունի ուղեղի հետ։
***
Նրանք գրել են ամբողջական գրադարաններ հակիրճության անհրաժեշտության մասին։
***
Գրել է․ «Անասունների գլխաքանակն աճում է»։ Լավատե՞ս է թե՞ վատատես։
***
Նրանք վերջապես հասկացան իրար։ Եկան այն եզրակացության, որ իրենք թշնամիներ են։
***
Մեր օրերը հաշված են․․․ վիճակագիրների կողմից։
***
Անգամ մարգարեի մորուքը կարելի է սափրել։
***
Տաբատը մաշվում է նույնիսկ գահի վրա։
***
Համակրանքի թելը հաճախ վերածվում է պարանի, որը մեզ գերի է պահում:
***
Սնոբ մի՛ եղիր։ Երբեք մի՛ ստիր, երբ ճշմարտության համար ավելի լավ են վճարում։
***
Ոտքերը լվալու համար՝ մի՛ սպասեք ջրհեղեղի։
***
«Առյուծին չծաղրել»։ – Ինչո՞ւ, հարցրի խնամողին։ «Փորլուծություն է ձեռք բերում»,- պատասխանեց։
***
Ամեն գիշեր չէ, որ ավարտվում է լուսաբացով։
***
Նույնիսկ նրա լռության մեջ լեզվական սխալներ կային։
***
Ամենադժվարը դժոխքն այրելն է։
***
Ամեն համազարկ չէ, որ հեղափոխություն է ազդարարում։
***
Բոլորը չէ, որ կարող են պարել ապագայի երաժշտության տակ։
***
Վերադարձ դեպի քարանձավ չի լինի․ մենք չափազանց շատ ենք։
***
Նույնիսկ ինչ-որ բանի ծափահարելու համար՝ հարկավոր է տակտի զգացում ունենալ։
***
«Ազատության երգը» չի կարելի նվագել բռնության գործիքով։
***
Չի կարելի մոմով կույս փնտրել։
***
Մի կտրիր ճյուղը, որի վրա նստած ես, եթե իհարկե չեն ուզում քեզ դրանից կախել։
***
Աստծուն մի՛ հարցրու դրախտ տանող ճանապարհի մասին․ ամենադժվարը ցույց կտա։
***
Պարտադիր չէ ունենալ դեմք, բավական է քիթ ունենալ։
***
Մի՛ վստահիր սրտին, այն ծարավ է քո արյան։
***
Անատամ բռնակալներին չի կարելի ծիծաղեցնել:
***
Ոչ բոլոր պատմական դեմքերն են իրական։ Որոշները գոյություն են ունեցել միայն իրենց իսկ պատկերացումներում։
***
Տաղանդի պակասը բավարար չէ, էպիգոն դառնալու համար՝ անհրաժեշտ է նաև ուժեղ կամք։
***
Դժվար չէ ասել՝ ես կամ, դեռ պետք է նաև լինել։
Թարգմանությունը լեհերենից՝ Տաթև Խաչատրյանի
