2015 գրական տարին

Գրանիշ լավագույնները

Այսօր համացանցային տիրույթում և դրա սահմաններից դուրս գործող բազմաթիվ գրական կայքեր, անհատական բլոգներ և գրական պարբերականներ մեծ հնարավորություն են ընձեռնում ստեղծագործող անհատներին՝ հրապարակվել և ներկայացված լինել հանրությանը: Սակայն, մյուս կողմից, համատարած ազատությանն ու բազմազանությանը այս տարերային ընթացք իր հետ բերում է տարանջատելու, իրական գրական գործը նկատելու և առանձնացնելու դժվարությունը: Երբեմն անհրաժեշտություն է առաջանում խախտել համատարած չեզոքության ապահով լռությունը և գրական տարվա կտրվածքով առանձնացնել առանձին հեղինակներ և անուներ՝ արժևորելով ու կարևորելով նրանց գրական ստեղծագործությունը, կատարած աշխատանքը:

Տարեվերջյան այս ամփոփումը, կարծում ենք, հրաշալի առիթ է ևս մեկ անգամ հետադարձ հայացք նետել անցած գրական տարվան, Գրանիշի գրական համայնքի կատարած գործունեությանը, նկատել մեր բացթողումներն ու առաջընթացները և ձեզ ներկայացնել Գրանիշի տարվա լավագույններին:

Գրանիշն արդեն շուրջ 6 տարի է գրական դաշտում է և այս տարիների ընթացքում մեր թիմը մեծածավալ աշխատանք է կատարել՝ իր ընթերցողներին ներկայացնելով ժամանակակից հայ գրականության ամենաառանցքային հեղինակներին, բազմաթիվ թարգմանական նորություններ, նպաստել գրահրատարակչական դաշտի կայացմանը, աշխատել մեծ թվով գրողների, գրականագետների ու թարգմանիչների հետ: Այսօր վստահաբար կարող ենք ասել, որ Գրանիշը հայ ժամանակակից գրականության ամենամեծ առցանց հավաքածուն է:

2015 թվականին շարունակելով իր հիմնական առաքելությունը, Գրանիշը մեծ ուշադրություն է դարձրել նոր անունների հայտնաբերմանն ու ներկայացմանը՝ այդ թվում և՛ գրողների, և՛ գրականագետների, և՛ թարգմանիչների հետ աշխատանքներում: Բազմաթիվ գրական նախագծեր ու լրատվամիջոցներ, հրատարակիչներ մեր բացահայտած հեղինակների հետ շարունակում են աշխատել և դա մեզ համար ոչ թե խանդի, այլ հենց վաստակած արդյունքի ցուցիչ է: 2016 թվականին Գրանիշը շարունակելու է իր բաց գրական գործունեությունը՝ սպասեք նոր ու տաղանդավոր անունների հայտնությանը, նորանոր ու հետաքրքիր գրական վերլուծություններ և հետաքրքրաշարժ, ուշագրավ թարգմանություններ:

Այսպիսով՝ ԳՐԱՆԻՇ-ը ամփոփելով 2015 թվականին իր էջերում հրապարակված նյութերը (շուրջ 240 հրապարակում) առանձնացրել է հինգ հիմնական անվանակարգեր՝ պոեզիա, պատմվածք, էսսե, գրականագիտություն, թարգմանություն և յուրաքանչյուր անվանակարգում ընտրել հինգ լավագույն ստեղծագործություն(հերթականությունը պայմանական է): Լավագույները ընտրվել են խմբագրակազմի, մասնագետների և գրականասեր ընթերցողների արձագանքների հիման վրա: Ինչպես նաև՝ լավագույններին որոշելիս հիմք ենք ընդունել այն հանգամանքը, որ հեղինակն իր տվյալ ստեղծագործության առաջին հրապարակումը վստահել է հենց ԳՐԱՆԻՇ-ին:

Զուգահեռ ներկայացնում ենք նաև 2015 թվականի ընթացքում ամենաշատ դիտումներ ունեցած հրապարակումները՝ կրկին ըստ անվանակարգերի (ցանկերը կազմվել են հենց 2015-ին արված բոլոր հրապարակումների հիման վրա):

Այս ամենից զատ առանձնացրել ենք նաև հատուկ անվանակարգեր, ինչպես նաև ԳՐԱՆԻՇԻ-ի բոլոր ժամանակների ամենադիտված հրապարակումների ցանկը:

Նշանաբառ՝

Կարդացեք նաև՝

Leave a Reply

Շատ են կարդում՝