Ես աղջիկ գիտեմ, որն ինձ երբեք չի ների այն,
որ միասին մետրո ենք մտել:
Նա մենակ դուրս եկավ այնտեղից:
Ես ճանաչում եմ մի աղջկա, որի խոսելու ոճն ազնվացնում էր ինձ…
Նա այսօր անշարժ գույք է գովազդում:
Էլի մեկին գիտեմ, որ բովանդակության խրախճանք է:
Նա որևէ համաստեղության ծնունդ է ըստ ճաշակի…
Ես ճանաչում էի մի աղջկա, որն իր սերերից ոչ մեկին
չի դադարել սիրել մեկը մյուսին չենթադրող սիրով:
Նրա ժպիտն առանց օղակների շղթա է:
Ես ճանաչել եմ մի աղջկա, որը գոտկատեղից ներքև ստիխներ էր գրում`
առանց սեռական ենթատեքստի…
Սիրելը նրա համար ջրի ճամփա էր:
Ես այսօր էլ ճանաչում եմ մի աղջկա, որի կրունկները
կոշիկների դիմացն են:
Աղջիկ չէր, այլ` աղջկա հայտ:
Ու ևս մեկին էի ճանաչում, որի ապրելու մոտիվացիան
Քիմ Քարդաշյանի պոռնովիդեոն է:
Մենք
միասին քննարկել ենք անձի ճգնաժամը Բերգմանի ֆիլմերում…
Ես ճանաչում եմ մի ընթերցող աղջկա, որին այլևս երբեք
գրախանութներում չեմ գտնի:
Փոխարենը նա է ինձ գտնում:
Մեկին, որի հետ չեմ կարող նույն օդը շնչել ոչ միայն Երևանում,
այլև՝ Հայաստանում:
Ու սրա վերջը ես չգիտեմ:
Ես ճանաչում եմ մի աղջկա, որի մեջ ամբոխի ընթերցողը կա…
Համենայնդեպս աշխատում է ոստիկանությունում…
Գիտեի մեկին, որը կարողանում էր բանաստեղծություն գրել
բանաստեղծության մեջ…
Նա ոչինչ չէր լսել Էլսինորի մասին:
Ես ճանաչում եմ մի աղջկա, որն այնքան գեղեցիկ է լսում:
…և կարող է կորցնել իրեն քամիների մեջ:
Ու վերջապես մեկին, որի լռությունը խցանվում է իմ ականջներում:
…և դեռ տեղ ունի լռելու:
Ես ճանաչում էի մի աղջկա, որի ժպիտն իրենից շուտ էր ինձ հասնում…
Ես համբուրել եմ աչքերը մեկի, որը երկրորդական հմայք ուներ:
Նա դեռ չի սիրել ոչ մեկին:
Ես ճանաչում էի մի աղջկա, որն իր սերը համարում էր одолжения:
Ու բոլորից լավ գիտեի նրան, որ չորս տարում հրեշտակից դարձավ
նախկին բանաստեղծություն…
…ու փաստորեն ես ոչ մեկին չեմ ճանաչում:
ես ճանաչեցի մի աղջկա, որը այս աղջիկներից բոլորն ունի իր մեջ :)) շնորհակալություն, շատ լավն էր….