Քերսթին Փրայվուսս- գերմանացի գրող, մշակութային լրագրող:
Քերսթին Փրայվուսսը ծնվել է Լյուբցում (Գերմանիա) 1980 թվականին, մեծացել է Պլաու Ամ Զե-ում և Ռոստոկում: Գերմաներեն, փիլիսոփայություն և հոգեբանություն է սովորել Լայպցիգում և Էքս-ան-Պրովանսում, ավելի ուշ՝ սկսել է գրականություն ուսումնասիրել Լայպցիգի գերմանական գրականության ինստիտուտում, որտեղ էլ այժմ դասավանդում է: 2010 թվականին ստանձնել է «Edit» գրական ամսագրի խմբագրությունը, որտեղ նաև հրապարակում է իր գրախոսականներ։
Քրեսթին Պրեյվուսն նաև թարգմանում է պոեզիա, վարում է գրական սեմինարներ և դասախոսություններ է կարդում համալսարաններում: Գերմանիայի Պեն կենտրոնի անդամ է, ապրում է Լայպցիգում:
Ես կողպեցի ինքս ինձ
Ես կողպեցի ինքս ինձ:
Փակվեցի աշխարհից:
Շշնջացի մի պահ
Ձմեռը մոտենում է:
Պարուրվեցի ձմռան մեջ
և այլևս ոչինչ չլսեցի
աշխարհից։
Ննջում եմ աշխարհի ներսում՝
հազիվ շնչելով:
Խավարի ծածկոցով փաթաթված
երազում քաղցր շիլա եմ ուտում։
Խավարը հաճելի է ու հարազատ:
Միայն ձմռանն եմ ծերանում։
Չեմ ցանկանում արտաբերել այն ամենն ինչ կա մտքումս
Չեմ ցանկանում արտաբերել այն ամենն ինչ կա մտքումս,
այն ինչ շուրթերիցս պոկվում ու ճախրում է,
մնում է անդառնալի օդից կախ աշխարհում:
Այն մնում է այնտեղ՝ որտեղ կա
Ու կուրորեն մնում ու արմատավորվում ատամի պես՝
ինչպես երեխան, երբ մեծանում է:
Ծիծաղելիս այլևս չեմ ցանկանում ուրվագծել լույսն ու ստվերը
մկրատի կտրվածքի նման:
Ո՛չ որսորդ եմ ուզում դառնալ, ո՛չ ավար:
Լինել անսպառ:
Մեկ է ինձ ամեն ինչ աշխարհում:
Կմնամ այն, ինչ կամ:
Իսկ աշխարհ վերադառնալը
նման է կայծակին, որը հարվածել է ինձ:
Եվ ժամանակ առ ժամանակ ցուրտ կլինի աշխարհում:
Իմ մեջ ննջում է քամու հարսնացուն
Իմ մեջ ննջում է քամու հարսնացուն:
Ամեն խեցու մեջ մի ճոճվող էմբրիոն
տեսնելիս զգում եմ մխիթարող հանգստություն:
Ես լավ ձեռքերում եմ՝ անկախ նրանից, թե ինչ է մոլեգնում իմ ներսում:
Քամու հարսնացուն ննջում է ներսումս:
Անցավ մեկ տարի:
Քամին այժմ ինձ հետ ննջում է դրսում։
Քամին դրսում է։
Մենակ եմ դրսում:
Լքյալ լինելն այսպիսի հնչյուն ունի:
Ես գիտեմ, որ դա առասպելի նման է:
Ես այն եմ՝ ինչ մոլեգնում է իմ ներսում:
Թարգմանություը գերմաներենից՝ Տաթեվ Շվաբաուերի
