ՍԻՎԻԼԻԹԱՍ / Ի սկզբանե բանն էր

Շատ ավելի հեշտ է խոսել նոր երևույթների կարևորության մասին, քան ինչ որ նոր բան ասել առանց այդ էլ հասկանալիորեն արժեքավոր մի բանի մասին:

Հենց այդ պատճառով գրադարանների և գրքերի արժեքի մասին խոսելը բարդ է: Ի՞նչ կարելի է այդ մասին ասել: Որ հասարակությանը պե՞տք է մատչելի լինեն լավ գրքերը: Որ հատկապես մեզ նման երկրների համար մրցունակության միակ երաշխիքը գիտելիքն ու տեղեկացվածությո՞ւնն է: Ո՞վ կարող է վիճել դրա հետ:

Ինչո՞ւ պետք է գիտելիքը երկրի առաջնահերթությունների ցանկում առաջինը լինի: Բացատրությունը պարզ է: Որովհետև գիտելիք` նշանակում է նորարարություն, ստեղծագործական միտք, ճիշտ գործելու, ճիշտ կողմնորոշվելու կարողություն և ի վերջո նաև` տնտեսական աճ, մրցունակություն, հզորություն: Գիտակից, տեղեկացված և կիրթ քաղաքացիական հասարակությունը ազգային անվտանգության հիմքն է: Ես իհարկե որևէ նոր բան չեմ ասում:

Բայց նաև դժվար է հասկանալ, թե ինչպես կարող ենք մենք բոլորս գիտակցել սա, բայց անկարող լինել որևէ բան անել այս կապակցությամբ:

Հենց այս խնդրի մասին զրուցելու ցանկությամբ, ամառային դադարից հետո մենք հրավիրում ենք Ձեզ մեր հերթական հանրային քննարկմանը: Ի՞նչն է, որ խանգարում է մեզ օգտվել ժամանակակից աշխարհում այդքան մատչելի և այդքան բազմազան տպագիր խոսքի հնարավորություններից, տարածել գաղափարները, գիտելիքը, գրականությունը և առավելագույն օգուտ քաղել դրանից, որպես գրագետ բնակչությամբ, փոքր երկիր:

Մինչ ամառային դադար էր Սիվիլիթասի հանրային քննարկումների ծրագրում, մեր մի քանի այլ ծրագրեր ակտիվորեն շարունակվում էին: Ու քանի որ այս ուրբաթ խոսելու ենք գրքերի մասին, ուրախ եմ տեղեկացնելու, որ “Գրադարանները որպես քաղաքացիական հասարակության կենտրոններ” ծրագրի իրականացումը շարունակվում էր ամռան ընթացքում և հիմա: Հույս ունենք, որ նաև այս ծրագիրը կնպաստի գրադարանները հասարակության համար ավելի գրավիչ դարձնելուն: