Բանաստեղծներ, որ նոր պիտի գաք, հռետորներ, երգիչներ ու երաժիշտներ, որ նոր պիտի գաք,
Ներկան երբեք ինձ չի արդարացնի, չի պատասխանի, թե ինչի համար եմ,
Այլ դո՛ւ, նոր սերունդ, անխառն, ճկուն, ողջամիտ, անցյալից առավել փառավոր,
Բարձրացիր, քանզի դու պիտի արդարացնես ինձ:
Ես միայն մեկ-երկու ցուցական բառեր եմ գրում ապագայի համար,
Ես ժամանակի անիվին միայն մի ակնթարթ եմ մոտենում ու շտապում դեպի խավար:
Ես մի տղամարդ եմ, որը քայլելով առանց կանգառի`
պատահական մի հայացք է գցում ձեզ վրա ու շրջում իր դեմքը,
Թողնելով, որ ինքներդ պարզեք և բնորոշեք,
Ես հիմնականն եմ սպասում ձեզանից:
Թարգմանությունը անգլերենից՝ Սամվել Մկրտչյանի
